АКАФИСТ
Преподóбному и богонóсному отцу нашему
СТИЛИАНУ Пафлагóнскому,
предстáтелю чáд и безчáдных жен
Кондак 1
Избранный чудотвóрче Христов и скóрый помóщниче, преподобне отче наш Стилиáне, прославляюще Бога, от утрóбы матерни тя освятившаго, похвáльная восписýем ти; ты же, яко теплый предстáтель и милостивый, от всяких нас бед свободи, да зовем ти:
Радуйся, преподобне Стилиáне, великий чудотвóрче.
Икос 1
Ангелов и человеков Творец избрá тя изначáла, да прослáвиши ангельским твоим житием имя Святыя Троицы, и мирскáя отринув попечéния, возблистáеши, яко Солнца правды луча светлéйшая. Мы же, зряще твоя всечестныя подвиги, смирением и радостию глаголем ти сицевая:
Радуйся, Церкве святыя похвало,
Радуйся, Пафлагóнии крепкий стóлпе;
Радуйся, помощи требующих усéрдное слышание,
радуйся, отшéльников небýрное отишие;
Радуйся, образе кротости и смирения,
Радуйся, грешников исправлéние;
Радуйся, молитвы пустынныя высотó,
Радуйся, упования и любве глубинó;
Радуйся, недýжным усéрдное вспоможение,
Радуйся, верных честнóе удобрéние.
Радуйся, преподобне Стилиáне, великий чудотворче.
Кондак 2
Видя тя Бог, яко сéмя благóе и избрáнное, от ложесн мáтерних освяти тя и Духа сосуд яви тя. Ты же, стопы своя к безмолвию направляя, крест честный чрез все житие пронесл еси, знáменуя тем вéлию любовь нас ради Распятаго, Ему же приносим песнь: Аллилуиа.
Икос 2
Разум небесный даровáся ти, отче Стилиáне, еще бо юну ти сýщу, гóрняя мýдрствоваше; сего ради имéние раздав, осия молитвами твоими мрак пещéры, в нейже скрылся еси. Тéмже услыши от нас таковая:
Радуйся, от юности Христу послуживый,
радуйся, мироотрéчное житие явивый;
Радуйся, яко лютая в пещере терпéвый,
радуйся, яко тлéнная вся презрéвый;
Радуйся, свéте монашества златосиянный,
радуйся, цвéте преподобия богоизбрáнный;
Радуйся, имже Пафлагония величáется,
радуйся, имже лик святых украшáется;
Радуйся, силою крестною победителю,
радуйся, верный Христов служителю.
Радуйся, преподобне Стилиане, великий чудотворче.
Кондак 3
Сильну надéжду возлóжших на тя многи недуги душéвныя же и телесныя целиши, тáже припадáющих ти бед и скорбей свобождáеши. Сего ради ныне к тебе притекающе, молим тя со слезами: к Вышняго престолу наша прошения принеси, славящих Бога и поющих Тому: Аллилуиа.
Икос 3
Имея ревность к подвигóм монашескаго жития, также безмóлвие возлюбив, в пещере, токмо любовию Божиею освященней, водворися, идéже пищу от ангела приимáя, живот свой богоугодне в нищете, посте и молитве скончá. Мы же, святым твоим трудóм дивящеся, приносим ти пéния таковáя:
Радуйся, тленных всех устранивыйся,
радуйся, к Царству Небесному устремивыйся;
Радуйся, яко Христа воистину возлюбил еси,
радуйся, яко ум и сердце в молитве к Богу утвердил еси;
Радуйся, мудре, ветия просвещáющий,
радуйся, радость небесную возвещáющий;
Радуйся, источниче живонóсный пустыни,
радуйся, трубó велеглáсная, отгоняющая уныние;
Радуйся, тéплый в бедáх и скóрбех утéшителю,
радуйся, со страстьми борющимся споспéшителю.
Радуйся, преподобне Стилиане, великий чудотворче.
Кондак 4
Бурю злых искушений отгоняя, тесный и многоскорбный путь прохождáше, иго Христово, иго безмолвия же и всенóщных стояний взем, богодарованне на верх совершенства возшел еси, да сподóбишися со ангелы славити Бога, поя Ему: Аллилуиа.
Икос 4
Слыша и видя житие твое чистое и святое, преподобне отче Стилиáне, лик монáшеский от страны пафлагóнския зело дивляшеся, тщáщеся всячески похвалити тя. Мы же верою и рáдостию глагóлем ти сицевáя:
Радуйся, на высоту святости восшéдый,
радуйся, крине избрáнный, пустыню облагоухáвый;
Радуйся, вышнее чудо и Цéркве честнéйший сосуде,
радуйся, дáры небéсными вооружéнный воине Христов;
Радуйся, в прéдних предстáтелю наш у престóла Великаго Царя,
радуйся, дóбрый Божий служителю, во благáя уготóванный;
Радуйся, Богу угóдный пóстниче,
Радуйся, крепкое основание и скорый помощниче;
Радуйся, яко Христу Богу со смирением послужил еси,
радуйся, яко вéрныя молитвами своими укрепил еси.
Радуйся, преподобне Стилиáне, великий чудотворче.
Кондак 5
Богоприятными твоими мольбáми скоротéчную смерть младéнцев устáвил еси, изымáя призывающих имя твое и подóбие зрáка твоего изобразýющих пáгубы и смерти; тогда мáтери печáльныя возрáдовашася, Бога слáвящя и Тому поющя: Аллилуия.
Икос 5
Видя младéнцы, на одрé болезни стрáждущыя, сих мольбáми твоими воздвигл еси, скорби мáтерни на веселие прелагáя, добрых чад рождéние испрошáя, Стилиáне святе. Убо дар сицевый от Бога приéмшему, вéрнии твоя чудныя и прехвальныя подвиги свéдуще, песнопоим таковáя:
Радуйся, крóтостию духа лукáваго отгнáвый,
радуйся, мáтерей о болящих чáдех печáлующих утéшивый;
Радуйся, яко мнóги чада недýжныя исцеливый,
радуйся, тако ся покровителя отрочáт явивый;
Радуйся, к немуже младенцы непрестáнно прибегáху,
Радуйся, яко ревнитель Божией любви от дел показáлся еси;
Радуйся, малодýшных укреплéние,
радуйся, семéйств наших утверждéние;
Радуйся, чад небесный хранителю,
радуйся, вышними дáры вооружéнный отшéльниче.
Радуйся, преподобне Стилиáне, великий чудотворче.
Кондак 6
Проповéдует даже до днесь край Пафлагóнский пóдвиги и труды твоя, Стилиáне святе, понéже непрохóдныя мéста и дикия испóлнишася благоухáний твоих молитв, и якоже иногдá фесвитянин Илия, пустыни прозябéние ты показáлся еси. Сего ради Богу хвалебными гласы поем: Аллилуиа.
Икос 6
Возсияв звездою блистающею, отгнáл еси невéрия тьму: мнози бо свящéнными твоими предстáтельствы от греховнаго мрака ко спасéния свету извéл еси, того ради от Бога чудотворéния благодать приим. Мы же, чтýще труды и духóвныя дáры твоя, восписýем ти таковая:
Радуйся, боговидче пресветлый,
радуйся, храме Духа Святаго преудобрéнный;
Радуйся, имже преподóбнии украшáются,
радуйся, имже делатели укрепляются;
Радуйся, яко еще в теле сый, рáйстей слáдости причастися,
радуйся, яко водою живóтною напоися;
Радуйся, грехолюбивым огрáдо,
радуйся, многопечáльным отрáдо;
Радуйся, яко пути небéсному научаеши,
радуйся, яко молитвою дéмонския полки расточáеши.
Радуйся, преподобне Стилиáне, великий чудотворче.
Кондак 7
Всякое естествó человéческое удивися, святе, безмóлвному житию твоему, во одежду бо смирéния истиннаго оболчéн, вéлиими дарами свыше обогатился еси. Сего ради с тобою вкупе слáвим Бога, поюще: Аллилуиа.
Икос 7
Новое показа житие Владыка всех тобою, преподóбне отче, Господа бо ради живот в пустыни препроводил еси, пóмыслы смирéнием к вышним возводя и молитвою истóчник дарóв низводя. Мы же, попечéньми и страстьми потемнéннии, хвалим со умилéнием чистую и святую твою яже к Богу любовь, рáдостная поюще:
Радуйся, цвете тáинственнаго благоухания,
радуйся, сокрóвищнице неиссякáемая щедрóт;
Радуйся, молитвою пламенéющий о уязвлéнных страстьми,
радуйся, бýиих тихостию укрощáющий;
Радуйся, пáстырю наш предóбрый,
радуйся, отче милостивый и крóткий;
Радуйся, оструплéнных душéю и тéлом целителю,
радуйся, ко истинней жизни путеводителю;
Радуйся, малодýшныя утешáяй,
радуйся, пáдшия возставляяй.
Радуйся, преподобне Стилиáне, великий чудотворче.
Кондак 8
Стрáннну ти сýщу в мире сем, вся возвеселил еси ангельским твоим житием, ныне же, в небéсней славе Царю Христу предстоя, не забýди совершáющих память твою, обáче моли даровáтися грехов разрешению и причáстию вечных благ, да с тобою во веки поим: Аллилуиа.
Икос 8
Вся пафлагóнская страна устремися к тебе, яко сосуду избрáнному Святáго Духа, тáже от дáльних мнóзи к тебе притекáху, пóмощи чáюще, ты же, тогда и днесь врачевáния щéдре точáщий, приими от нас таковáя:
Радуйся, молитвенниче о спасéнии чтýщих тя,
радуйся, Духа свиреле, к покаянию вся зовущая;
Радуйся, яко молитвою стрелы врáжия отразил еси,
радуйся, яко в чистое твое сердце Бог вселися;
Радуйся, яко пóдвиги твоими Ангелы возвеселил еси,
радуйся, яко тéми диáвола препобедил еси;
Радуйся, верных от враг молитвенное ограждéние,
радуйся, монáшествующих крéпкое утверждéние;
Радуйся, о мире неисчéтное ходатáйство,
радуйся, присное за ны у Бога предстáтельство.
Радуйся, преподобне Стилиáне, великий чудотворче.
Кондак 9
Хотящу ти, преблажéнне отче, скончáти спасительныя твоя труды, душу в рýце Господа прéдал еси, святыми ангелы ко престолу, яже превыше небес, носимь, воспевáти песни хвалéбныя Бóгови, дивному во святых Своих: Аллилуиа.
Икос 9
Ветия добровещáнная недоумéют хвалити по достоянию силу твоея яже по Бозе любвé, яко милостив яви ся молитвою же и деяньми: заблýждшим яко добр путевождь, недýжным яко благоувéтлив врач, мáтерем обезчáдствованным яко утéшитель; мы же, о таковом ти даровáнии ниспóсланнем рáдующеся, благодарственная поим:
Радуйся, мира сокрывыйся выну Бóга хвалити,
радуйся, яко и ныне Того не престáвый о нас молити;
Радуйся, дар чудотворéния свыше приявый,
радуйся, яко мáтерей о умéрших чáдех печáльных, новым плодоношéнием возвеселивый;
Радуйся, яко многоразличных страстéй целитель показáлся еси,
радуйся, врачу скоропослýшливый;
Радуйся, тéплое о нас заступлéние,
радуйся, отрочáт от недуг ограждéние;
Радуйся, о тезоимéнных ти попечителю,
радуйся, скóрый помóщниче чтýщим тя.
Радуйся, Стилиáне, великий чудотворче.
Кондак 10
Спасительное дерзновéние ко Христу Богу нáшему имея, того, святе Стилиáне моли о нас, совершáющих память твою, прославляя Бога и поя ему: Аллилуиа.
Икос 10
Стена явился еси благоотишная от напáстей и бед, и прегрáда страстем, зане дýши наша и телесá обретáют тобою помощь, преподóбне óтче. Тем смирéнием Богу припáдающе, таже твой святый лобызáюще образ, хвалим тя, вопиюще:
Радуйся, Христов благоухáнный мире,
радуйся, боголюбéзныя молитвы кадило;
Радуйся, имже верным дáры ниспосылáются,
радуйся, имже всяческая искушéния побеждáются;
Радуйся, о спасении нашем попечéние,
радуйся, в День Судный о нас заступлéние;
Радуйся, о сýщих в бедáх печáльниче,
радуйся, страстéй телéсных отгнáние;
Радуйся, в тáинствах достигий Бóжия всыновлéния,
радуйся, изводяй вéрныя ко спасéнию.
Радуйся, преподобне Стилиáне, великий чудотворче.
Кондак 11
Пение всеумилéнное ти, отче, плéщуще, яко истиннаго дéлателя заповедей Господних мóлим: помози и нам во исполнéнии повелéний Божиих потрудитися, да небéсное Царство наслéдим, и с тобою вкýпе во веки прослáвим Того: Аллилуиа.
Икос 11
Светолéпныя взéмше свещи, вернии, приидите, в храме Божием поклонимся, преподóбному же Стилиáну да помолимся, тако поюще:
Радуйся, аки безплóтен сый в телеси,
радуйся, Ангелом собесéдниче;
Радуйся, яко к Бóгови все житие упрáвил еси,
радуйся, яко тем раб Его показáлся еси;
Радуйся, венец нетленный от Бога приявый,
радуйся, блаженство небесное со святыми наслéдовавый;
Радуйся, яко оттýду на ны призирáеши,
радуйся, яко молитвами твоими ны направляеши;
Радуйся, яко и ныне твоему заступлéнию прибегаем,
радуйся, юных кормчий и жéзле старых.
Радуйся, преподобне Стилиáне, великий чудотворче.
Кондак 12
Благодать подаждь хвалити и величáти тя, вси бо вернии тя ублажáем, чистéйший отче, имже Церковь Христова красýется и сияет монáшествующих лик. Моли милостиваго Бога, да сохранит Церковь и люди своя от всякаго злáго обстояния, огради дóмы наша теплотóю твоих молитв, да с тобою вкупе вознесéм песнослóвие: Аллилуиа.
Икос 12
Поюще всепрáзнственную пáмять твою, преподобне отче, тебе, добровóнному цвéту, даровáний Христовых испóлнену, и облагоухáвшему мира концы, восписýем похвáльная:
Радуйся, его же любовию людие Божии освящáются,
радуйся, его же божественным дáром недýжнии исцеляются;
Радуйся, рекó неиссякáемая святыя хвалы;
радуйся, о преслáвных и неизречéнных рáдование;
Радуйся, отрочáт сокрóвище возлюбленное,
радуйся, всерáдостная всех отрáдо;
Радуйся, яко тобою пути истинному научаéмся,
радуйся, яко образу жития твоего послéдующии спасáются;
Радуйся, помощи твоея трéбующих спомогáтелю,
радуйся, вéрных стóлпе и предстáтелю.
Радуйся, преподобне Стилиáне, великий чудотворче.
Кондак 13
О, преблажéнне чудóтворче святый, преподобне отче Стилиáне! Приими малое моление сие наше, в похвалу тебе возносимое, испроси у благáго Бога чтýщим тя, прегрéшений прощéния, нам и чáдом нашим здрáвия, мирови мир, тишину домóм нашим, да поим и славим Его: Аллилуиа.
Молитва
О, преподобне отче Стилиáне, крепосте и путевождю молитв наших! Ты страсти телéсныя препобедив и со áнгелы вселився, непрестанно зриши славу, уготóванную святым, небéснаго веселия исполняяся. Ныне, в невечéрнем свете пребывая и Царю Христу предстоя, не забýди уповáющыя на тя, иже со дерзновéнием молитвы к тебе вознóсят, просяще у тебе укреплéния. Ты, от чрева мáтерня освящéнный, сосуд Духа Святаго содéлавыйся, простирáяй тéплое попечéние о мáтерех же и чáдех, свобождáяй тыя печáли и скóрби, покажи ся скорый врач страстей и болезней душéвных же и телéсных хвáлящих тя. Ты, Пафлагóнию местом прославлéния Святыя Троицы содéлавый, ныне пустыню сердец наших в плодорóдную землю претвори, да достóйны дáра божéственнаго явятся, процветýт крины веры спасительныя и умнóжат плоды подвигóв добрых. О, преподобне отче Стилиáне! Сохрани твоими молитвами семьи и чада наша, моля Милостиваго Бога о прощении грехов, здравии и спасении, да с тобою вкýпе восхвáлим всесвятое имя Отца и Сына и Святаго Духа. Аминь.
Примечания:
Акафист переведен с румынского через русский подстрочник.
Во избежание стилистических ошибок и тавтологии (в том числе, смысловой), осуществлена радикальная редактура, а посему переводом текст акафиста назвать нельзя, скорее подойдет определение: приблизительный пересказ.
Еще возможна несущественная стилистическая правка.
Комментариев нет:
Отправить комментарий